Тапанча, ок, бычак... Бишкекте унаалар текшерилип, мыйзамсыз куралдар табылды

Бишкекте куралды мыйзамсыз алып жүргөн бир нече жаран аныкталды. Бул тууралуу борбор калаа милициясы билдирди.

Маалыматка ылайык, кечээ, 22-январда атайын рейд жүргүзүлгөн. Анда Range Rover үлгүсүндөгү унаа токтотулуп, андан 9 огу бар травматикалык тапанча табылган. Аталган курал 39 жаштагы жаранга таандык болуп чыккан.

Ошондой эле Lexus GX 470 үлгүсүндөгү унаа токтотулуп, ээсинен газ-пневматикалык тапанча табылган. БМВ Х5 үлгүсүндөгү унааны текшерүүдө газ-пневматикалык мылтык, эки бычак жана бир балта табылган. Мындан тышкары, дагы 2 унаа токтотулуп, газ-пневматикалык тапанчалар алынган.

Шаар милициясы жалпысынан 409 унаа текшерилип, жыйынтыгында 13 административдик протокол түзүлгөнүн кошумчалады.