Абу-Дабиде Украинадагы жаңжалды жөнгө салуу боюнча үч тараптуу сүйлөшүүлөр башталды

Украинадагы жаңжалды жөнгө салууга арналган Орусия, АКШ жана Украинанын үч тараптуу сүйлөшүүлөрү Абу-Дабиде башталды. Бул тууралуу Бириккен Араб Эмираттарында иш алып барган британдык Sky News телеканалынын кабарчысы Салли Локвудга шилтеме берүү менен чет элдик басылмалар жазышууда.

Анын айтымында, учурда орусиялык жана украиналык өкүлдөр бир бөлмөдө отурабы же жокпу, белгисиз.

Буга чейин Орусия Федерациясынын президентинин жардамчысы Юрий Ушаков Орусия, АКШ жана Украинанын коопсуздук маселелери боюнча үч тараптуу жумушчу тобунун алгачкы жыйыны 23-январда Абу-Дабиде өтөрүн басылмаларга билдирген. Орусия тараптан сүйлөшүү тобун Куралдуу күчтөрдүн Башкы штаб башкармалыгынын жетекчиси Игорь Костюков жетектейт. Ал эми үч тараптуу жумушчу топтун украин бөлүгүн Улуттук коопсуздук жана коргонуу кеңешинин катчысы Рустем Умеров жетектөөдө.