Өкмөт башчы кол алдындагылары менен Ала-Арчада жөө жүрүшкө чыкты

Министрлер кабинетинин төрагасы Адылбек Касымалиев өкмөт мүчөлөрү жана президенттин администрациясынын кызматкерлери менен биргеликте Ала-Арча мамлекеттик жаратылыш паркына жөө жүрүшкө чыкты.

Өкмөттүн маалымат кызматы кабарлагандай, иш-чара сергек жашоого үндөө, мамлекеттик кызматкерлердин арасында командалык маанайды бекемдөө, айлана-чөйрөнү коргоо жана ички туризмди өнүктүрүүгө көңүл буруу максатында уюштурулган.

"Жөө жүрүштүн алкагында Адылбек Касымалиев активдүү эс алуунун баалуулуктарын жайылтууда жетекчилердин жеке үлгүсү маанилүү экенин белгиледи. Жөө жүрүшкө катышкандар парктын корголуучу аймагынын инфраструктурасынын учурдагы абалы менен таанышып, өлкөнүн жаратылыш мурастарын кылдаттык менен башкарууга байланышкан маселелерди талкуулашты", - деп айтылат маалыматта.