Бишкек мэри Свердлов районуна жаңы кошулган аймактардын тургундары менен жолугушту 

Бишкек шаарынын мэри Айбек Жунушалиев шаарга жаңы кошулган аймактардын тургундары менен жолугушту. Бул тууралуу калаа мэриясынын басма сөз кызматы кабарлады.

Маалыматка ылайык, иш-чарага Свердлов районуна кирген МТФ-2, Нур-Кожо, Ак-Бата, Ак-Жар, Лебединовка, Аламүдүн, Төмөнкү Ала-Арча жана 305-МАБ аймактарынын жашоочулары катышкан.

Анда мэр жол куруу иштеринин жүрүшүндө мэрия тарабынан мыйзамсыз жайгашкан чарбалык объекттер жана жаңы курулган фундаменттер алынарын, бирок мыйзамсыз деп табылган турак жайлар буга чейин бузулбагандыгын жана мындан ары да бузулбай турганын белгилеген. Мындан тышкары, бир катар социалдык жана инфраструктуралык маселелер көтөрүлүп, өзгөчө таза суу, канализация, жолдордун абалы жана коомдук транспорттун жетишсиздиги негизги көйгөй катары белгиленген.

"Президенттин тапшырмасына ылайык, жаңы кошулган аймактарды өнүктүрүү максатында 2030-жылга чейинки атайын программа иштелип чыккан. Аталган программага ылайык жалпы каржылоо көлөмү болжол менен 9 миллиард сомду түзөт. Быйыл бул программанын алкагында иштер башталып, 2,5-3 миллиард сомго жакын каражат тартылган",- деп жазылган маалыматта.