Окуучуларды башка мектепке которуу электрондук систем аркылуу жүргүзүлөт

Министрлер кабинетинин башчысы Адылбек Касымалиев окуучуларды бир мектептен экинчи мектепке которуунун электрондук механизмин киргизүү боюнча жыйын өткөрдү.

Өкмөттүн маалымат кызматы билдиргендей, бүгүнкү күндө өлкөдөгү 2170 мамлекеттик жана муниципалдык мектепте 1,5 миллиондон ашык бала билим алат. Бирок окуучуну бир окуу жайдан экинчисине которуу процесси дагы деле кол жазма режиминде жүргүзүлүп, бул коррупциялык тобокелдиктерге жана мектептерге бирдей эмес жүк түшүүсүнө шарт түзөт.

"Биз ата-энелер көнүп калган биринчи класска электрондук каттоодон ийгиликтүү өттүк. Эми которууларда да ушундай тартипти орнотууга убакыт келди. Систем класстарда бош орундардын бар экендигин автоматтык түрдө көрсөтүп, чечим кабыл алууда адам факторун жокко чыгарышы керек. Бул мектептин администрациясынын жүгүн жеңилдетип, процессти ар бир ата-эне үчүн түшүнүктүү кылат",- деген Касымалиев.

Талкуунун жыйынтыгында өкмөт башчысы Агартуу министрлигине кыска мөөнөттө жалпы билим берүү уюмдарынын ортосунда окуучуларды которуунун электрондук системин иштеп чыгуу жана ишке киргизүү тапшырмасын берди.