Адылбек Касымалиев экономиканын өсүшүнө салым кошкон тармактарды тизмектеди

Бүгүн, 26-январда Ынтымак Ордодо министрлер кабинетинин төрагасы Адылбек Касымалиев кеңешме жыйын өткөрүп, экономиканын өсүшүнө бардык тармактар салым кошконун билдирди.

Өкмөт башчы белгилегендей, курулуш сектору 21,1 пайызга, тейлөө сектору 10,9 пайызга, айыл чарбасы 2,2 пайызга өскөн. Өнөр жайда өсүү 10,7 пайызды түзүп, өнөр жай продукциясынын көлөмү дээрлик 800 миллиард сомго жеткен. Өзгөчө жогорку өсүш: фармацевтика тармагында 1,7 эсе, тамак-аш азыктарын өндүрүү 30,1 пайыз, резина жана пластмасса буюмдарын, ошондой эле курулуш материалдарын өндүрүү 35,7 пайыз, автомобиль өндүрүү дээрлик 2 эсе, химиялык продукцияны өндүрүү 19,8 пайыз, ошондой эле пайдалуу кендерди казып алуу 14,2 пайыз катталган.

"Негизги капиталга инвестициялардын көлөмү 18,4 пайызга көбөйүп, 374,6 миллиард сомду түздү, бул рекорддук көрсөткүч болуп калды жана 2024-жылга салыштырмалуу 100 миллиард сомго көп. Негизги капиталга салынган инвестициялардын 24 пайыз же 90,3 миллиард сому республикалык бюджеттин эсебинен каржыланды, бул 2024-жылга салыштырмалуу 42,7 пайызга көп",- деген ал.

Касымалиев өлкөнүн ИДПсы 2 триллион сомго жакындап калганын кошумчалады.