Сокулукта башка адамдын жерин мыйзамсыз ээлеп алууга шектелген аял кармалды

Сокулук районунда бөтөн адамдын жерин мыйзамсыз ээлеп алган деген шек менен 64 жаштагы аял киши кармалды. Бул тууралуу Чүй облустук ички иштер башкы башкармалыгы билдирди.

Маалыматка ылайык, милицияга кайрылган Кожомкул айылынын 39 жаштагы тургуну айыл чарба багытындагы 3 гектар жер тилкесин белгисиз адамдар ээлеп алып, курулуш иштерин жүргүзгөндүгүн айткан.

Бул факт боюнча Кылмыш-жаза кодексинин 212-беренеси (Бөтөн жер тилкесин өзүм билемдик менен ээлеп алуу жана максаттуу багытын бузуу менен айыл чарба багытындагы жерлерге өзүм билемдик менен курулуш куруу) менен кылмыш иши козголгон. Шектүү убактылуу кармоочу жайга киргизилген.

Облустук милиция учурда ушул сыяктуу арыздар менен дагы 15 жаран кайрылганын кошумчалады. Тергөө иштери уланууда.