"Чындыкты билбей туруп..." Депутат Элдар Сулайманов билдирүү жасады

Жогорку Кеңештин депутаты Элдар Сулайманов мурунку жубайынын билдирүүсү боюнча тарап жаткан маалыматтарга комментарий берди.

"Коомчулукка тараган бул маселе жеке мүнөздөгү, көптөн бери уланып келген үй-бүлөлүк пикир келишпестикке байланыштуу. Айтылып жаткан куру доомат билдирүүлөр бир тараптуу мүнөзгө ээ, бул үчүн укуктук баа берүүнү талап кылат. Эгер мен окуянын экинчи жагын толук айтып берсем, бүгүн мени сындап же жек көрүп жаткан адамдар да ойлоно тургандай жагдайлар бар. Бирок мен буга барбайм. Ошондуктан чындыкты толук билбей туруп жыйынтык чыгарбаныздар. Учурда мага карата күнөөнү тастыктаган соттун мыйзамдуу чечими жок",- деп билдирди Сулайманов.

Депутат бул жагдайдын толук жана адилет каралышына ачыктыгын кошумчалап, коомчулуктан жана ЖМКдан тиешелүү органдардын чечими чыкканга чейин шашылыш тыянак чыгарбоону суранды.

Эскерте кетсек, интернет желесине депутаттын мурунку жубайы Асел Азаматова жолдошу тарабынан зомбулук көргөнүн билдирип, социалдык баракчаларына сүрөттөрүн жарыялады. Милиция сотко чейинки териштирүү башталганын айтып, аялга коргоо ордерин берди.