Чүйдө ГЭС куруучулардын эмгек акысын бербей койгон деп шектүү кармалды

Чүйдө чакан ГЭСтин курулушунда эмгек акыны төлөбөө фактысы боюнча шектүү кармалды. Бул тууралуу облустук милиция билдирди.

Маалыматка ылайык, былтыр 26-декабрда милицияга жамааттык арыз менен Москва районунун 36 жаштагы тургуну кайрылган. Анын айтымында, 32 жаштагы жаран 2024-жылдан тартып Ак-Суу капчыгайында жайгашкан чакан ГЭСтин курулушунда бетон иштерин аткаруу үчүн 25-30 жаранды тарткан. Бирок ал 2025-жылдын декабрь айы үчүн эмгек акыларын төлөбөй койгон.

Аталган факт боюнча Кылмыш-жаза кодексинин 209-беренеси (Алдамчылык) менен кылмыш иши козголгон. Тергөө шектүү 2024-жылдын октябрь айында субподрядчы катары оозеки макулдашуунун негизинде "А.Г.Э." компаниясына таандык ГЭС-1 жана ГЭС-2 объекттеринде бетон иштерин жүргүзүүгө киришкени такталган. Анда 1 куб метр бетон куюунун баасы 5 500 сом деп макулдашылган. Ишмердүүлүктү жүргүзүү үчүн шектүүнүн жубайы жеке ишкер катары катталып, шектүүгө ишеним кат берилген.

Иштерге 100гө жакын жергиликтүү тургун тартылып, аларга саатына 200 сомдон эмгек акы төлөнүп келген. Бирок 2025-жылдын ноябрь айынан 8-декабрына чейинки мезгилде болжол менен 25 жумушчуга эмгек акы төлөнгөн эмес. Көрсөтүлгөн мезгилде 7200 куб метрлик бетон иштери аткарылганы, ошондой эле башка курулуш иштери жүргүзүлгөнү аныкталган. "А.Г.Э." компаниясынан шектүү жаран алган акчанын жалпы суммасы 43 миллион 446 миң 878 сомду түзүп, анын ичинен 3 миллион 115 миң сому салык катары төлөнгөн.

Учурда тергөө иштери уланууда.