"Татыктуу гимн жазылган эмес". Спикер гимнге болгон сынак уланарын билдирди

Бүгүн, 28-январдагы Жогорку Кеңештин жыйынында парламент төрагасы Нурланбек Тургунбек уулу мамлекеттик гимнге болгон сынак уланарын билдирип, буга чейинки тандалган 3 вариантын тең депутаттар жактырышпаганын айтты.

Ал гимн Совет өкмөтүндөгү ыргактан алыс жазылышы керектигин белгиледи.

"Биз комитеттин мүчөлөрү менен бирге ал гимндердин текстин дагы, обонун дагы уктук. Бирок биз ойлогондой татыктуу гимн жазылган эмес. Андыктан комитеттин кароосунда эле артка кайтаруу чечимин кабыл алдык. Бүгүнкү ырдалып жаткан гимнди эле өзгөртүп коюу керек эмес, келечекте кыргыз эли жети жашар баладан тартып карыяга чейин эркин ырдай турган гимн болушу шарт.

Кийинки сынакка катыша тургандарга айтарым, бардыгы марш түрүндө жазылып калып жатат. Аны бардыгы ырдай албайт. Ошондуктан эркин болушу керек",- деди спикер.

Айта кетсек, кечээ, 27-январда Жогорку Кеңештин Конституциялык мыйзамдар, мамлекеттик түзүлүш, жергиликтүү өз алдынча башкаруу комитетинин жыйынында депутаттарга мамлекеттик жаңы гимндин үч варианты угузулган.