Парламент насыялык маалымат алмашуу жөнүндө мыйзам долбоорун 1-окууда жактырды

Бүгүн, 28-январдагы Жогорку Кеңештин жыйынында "Насыялык маалымат алмашуу жөнүндө" мыйзамга өзгөртүүлөрдү киргизүү тууралуу мыйзам долбоору каралып, биринчи окууда жактырылды.

Аталган мыйзам долбоорун министрлер кабинети демилгелеген.

Мыйзам долбоорун экономика жана коммерция министринин орун басары Беназир Нурланова тааныштырды. Ал белгилегендей, мыйзам долбоорунун максаты - насыялык маалымат чөйрөсүндөгү мыйзамдарды өркүндөтүү жана финансылык инклюзияны өнүктүрүү, жарандардын жана ишкерлердин насыялык ресурстарга жетүү мүмкүндүгү үчүн кыйла жагымдуу шарттарды түзүү болуп саналат.

Тагыраагы, мыйзам долбоорунун милдети насыялык маалыматтарды сактоо мөөнөттөрүн кыскартуу болуп саналат. Бул жарандардын насыяларга жетүүсүн жеңилдетүүгө, банк системине жүктөмдү азайтууга жана чакан жана орто бизнестин өнүгүшүнө дем берүүгө мүмкүндүк берет.