Беш жылда чоң секирик: Apple процессор рыногунда лидерлерге жакындады

Apple компаниясынын өзүнүн процессорлоруна (Apple Silicon) өтүүсү күтүлгөндөн да ири масштабда ийгилик алып келди. Mercury Research жана Bernstein Research аналитикалык компанияларынын маалыматына ылайык, беш жылдын ичинде Apple ноутбук процессорлорунун рыногунда AMDге дээрлик теңелди.

Учурда ноутбуктар сегментинде AMDнин үлүшү 21-22 пайызды түзсө, Apple’дин көрсөткүчү 18-19 пайызга жетти. Айырма абдан аз, айрыкча Apple чиптеринин рынокко жакында гана киргенин жана AMD процессорлору менен чыгарылган түзмөктөрдүн саны көп экенин эске алганда. Ошол эле учурда Intel компаниясынын позициясы алсырап бара жатат: азыр ал рыноктун 60 пайыздан ашыгын кармап турганы менен, 10 жыл мурун дээрлик толугу менен үстөмдүк кылган.

Ал эми үстөлдө туруучу компьютерлер рыногунда абал башкача болгону менен, тенденция ачык көрүнөт. Бул сегментте Apple болжол менен 10 пайыздык үлүшкө ээ. Бул тармакта Intel жоготкон үлүштөрдүн көбү AMDге өтүп жатканы колдонуучулардын альтернативалуу платформаларга болгон кызыгуусу өсүп жатканын көрсөтөт.

Адистер Apple’дин ийгилигин өзүнүн кеңири чиптик линейкасы менен түшүндүрүшөт. Анын курамына MacBook Air, Mac mini жана iPad Pro үчүн базалык процессорлор, кесипкөй ноутбуктар жана жумушчу станциялар үчүн Pro жана Max версиялары, ошондой эле эң оор тапшырмаларга арналган Ultra-чиптер кирет.