Бишкектеги жеке мектепте коопсуздук талаптарынын олуттуу бузулушу аныкталды

Бүгүн, 28-январда, шаар тургундарынын кайрылуусунун негизинде Бишкек шаарындагы "Креатив Таалим" жеке мектебинде жеринде текшерүү жүргүзүлдү. Текшерүүгө Бишкек шаарынын мэринин орун басары Виктория Мозгачева катышты.

Мэриядан билдиришкендей, иш-чаранын жүрүшүндө билим берүү мекемесинин аймагында коопсуздук талаптары олуттуу түрдө бузулгандыгы аныкталган. Тактап айтканда, жогорку кооптуулуктагы объект болуп саналган жылуулук берүүчү жай эркин кирүүгө ачык болгону, ошондой эле ачык чуңкурлар бар экени катталды. Мектепке чектеш аймакта антисанитардык абал орун алып, тосмолордун жана башка чектөөчү чаралардын жоктугу балдардын өмүрүнө жана саламаттыгына коркунуч жаратып жаткандыгы белгиленди.

Мындан тышкары мектеп от жагуу учурунда бөлүнүп чыккан зыяндуу газдарды тазалоочу жабдуулары жок системаларды колдонуп жатканы аныкталды. Бул айлана-чөйрөгө зыян келтирери белгиленип, мектеп жетекчилигине заманбап газ тазалоочу жабдууларды орнотуу маселесин кароо тапшырылды.

Ошондой эле үчүнчү кабатта сабак өтүлүп жаткан айрым окуу бөлмөлөрү өрт коопсуздугуна жана санитардык талаптарга жооп бербейт деп табылды. Буга чейин берилген көрсөтмөлөр аткарылбагандыктан, тиешелүү мамлекеттик органдарга жана мектептин лицензиясы боюнча Кыргыз Республикасынын Агартуу министрлигине кайрылуулар жөнөтүлөрү маалымдалды.

Текшерүүнүн жыйынтыгында "Креатив Таалим" жеке мектебинин жетекчилигине аныкталган кемчиликтерди кыска мөөнөттө жоюу, аймакты жана имараттарды талапка ылайык абалга келтирүү боюнча милдеттер коюлду. Балдардын коопсуздугун камсыз кылуу үчүн өзгөчө кооптуу зоналарды тосмолоп коюу боюнча чаралар жакынкы күндөрү көрүлүшү керек. Талаптар аткарылбаган учурда мыйзам чегинде тиешелүү чаралар көрүлөт.