БАЭ президенти АКШ-Украина-Орусия сүйлөшүүлөрүнөн кийин Москвага барды (видео)

Бириккен Араб Эмирликтеринин президенти Мухаммад бен Заид Аль Нахайян расмий сапар менен Орусиянын борбору Москва шаарына барды.

Чет элдик басылмалар билдиргендей, аэропорттон аны Орусиянын биринчи вице-премьер-министри Денис Мантуров тосуп алды. Бүгүн, 29-январда Мухаммад бен Заид Аль Нахайян Орусиянын президенти Владимир Путин менен жолугушууну пландап жатат.

Президенттин басма сөз катчысы Дмитрий Песковдун айтымында, эки өлкө лидерлери маанилүү сүйлөшүүлөрдү өткөрүшөт. Ал эки өлкө ортосундагы мамилелер ишенимдүү жана конструктивдүү деңгээлде экенин белгиледи.

23-24-январь күндөрү БАЭ президенти Абу-Дабиде Орусия, АКШ жана Украинанын делегация өкүлдөрүн кабыл алган. Сүйлөшүүлөрдүн негизги темасы Украина менен болгон чыр-чатакты тынчтык жолу менен жөнгө салуу болду.