Нуукта АКШнын желегин көтөрүүгө аракет кылган жаранга айып пул салынды

Гренландиянын борбору Нуук шаарында белгисиз жаран АКШнын желегин көтөрүүгө аракет кылган, бирок окуя болгон жерде жүргөн адамдар аны токтотушкан. Бул тууралуу Даниянын TV2 телеканалы кабарлады.

Маалыматка ылайык, окуя тынч мүнөздө өткөн. Күбөлөр мыйзам бузган жаранды желекти көтөрүп үлгүрө электе эле токтотушкан. Полиция кызматкерлери окуя болгон Нуук шаарындагы маданий борборго бир аз кечигип келишкен.

Кийинчерээк белгилүү болгондой, АКШнын желегин көтөрүүгө аракет кылган адам Германиянын Norddeutscher Rundfunk телекомпаниясынын кызматкери болгон. Компания өкүлдөрү анын бул аракетти Гренландияга карата АКШнын саясатын шылдыңдаган сатиралык тасма тартуу максатында "жасалма түрдө" жасаганын билдиришти.

Ошого карабастан тартип бузуу катары бааланып, аталган жаранга айып пул салынганы маалымдалды.