Бишкекте билим берүү уюмдарынын директорлору үчүн жыйын өттү

Бүгүн, 29-январда Бишкек шаарынын мэриясынын Билим берүү департаментинин демилгеси менен №115 мектептин базасында билим берүү уюмдарынын директорлору үчүн жыйын өткөрүлдү.

Шаардык мэриядан билдиришкендей, жыйында 2025-жылдын жыйынтыгы боюнча билим берүүнүн сапатын көзөмөлдөө, окуу-тарбия процессин текшерүү жана билим берүү мекемелерине методикалык жардам көрсөтүү маселелери талкууланды.

Ошондой эле санитардык-эпидемиологиялык кызматтын өкүлдөрү мектептерде кургак учук, сасык тумоо жана курч респиратордук вирустук инфекциялардын алдын алуу боюнча маалымат беришти. ӨКМдин Өрт көзөмөл кызматы билим берүү мекемелеринде коопсуздукту камсыздоого багытталган алдын алуу иш-чаралары тууралуу баяндады.

Кеңешмеге жалпысынан 128 жетекчи катышты.