Гренландия Евросоюзга кайтуу мүмкүнчүлүгүн талкуулоодо

Гренландия улуттук коопсуздукка байланыштуу Европалык союзга кайра кошулуу мүмкүнчүлүгүн карап чыгат. Бул тууралуу РИА Новости агенттигине Гренландия парламентинин вице-спикери Бентиарак Оттосен билдирди.

Анын айтымында, эгер АКШ тарабынан Гренландияга каршы жагымсыз экономикалык тарифтер киргизилсе, арал жетекчилиги Европалык союзга кайрылууга аргасыз болушу мүмкүн.

Белгиленгендей, бул маселе былтыр Гренландия парламентинде талкууланып, аралдын Европага кайтуу мүмкүнчүлүктөрү каралган. Азырынча Гренландиянын Европалык союзга Даниянын курамында же өз алдынча мамлекет катары кошулары тактала элек.

Оттосендин маалыматына ылайык, 2009-жылдан бери Гренландия автономиялуу макамга ээ болуп, келечекте Европалык союзга жана НАТОго өз алдынча мамлекет катары кирүү багытын да карап чыгышы мүмкүн.

Гренландия Дания падышачылыгынын курамына кирет. Ошол эле учурда Дональд Трамп арал АКШнын бөлүгү болушу керек деген пикирин бир нече жолу билдирген. Дания менен Гренландиянын бийлиги Вашингтонго аралды күч менен басып алуу аракетинен баш тартууну эскертип, өзүнүн аймактык бүтүндүгүн урматтоону талап кылган.