Трамп катуу суукта Киевге сокку урбай турууга Путинди көндүргөнүн айтты 

АКШнын президенти Дональд Трамп Орусиянын башчысы Владимир Путинден жеке суранып, катаал сууктан улам Киев жана башка Украина шаарларына соккуларды бир жумага токтотууга макулдугун алды. Бул тууралуу Трамп 29-январда АКШ президентинин администрациясынын өкүлдөрү менен жолугушууда билдирди.

"Абдан суук болуп жатат, рекорддук суук. Бул чоң көйгөй. Алар мындай суукту эч качан көргөн эмес",- деди Трамп. Анын айтымында, Путин макулдугун берип, соккуларды токтотууга болорун айткан.

Financial Times кабарлагандай, Украина өкмөтүнүн өкүлдөрү Орусиянын соккуларды токтотууга макулдугу тууралуу маалыматты Трамптын билдирүүсүнөн билишкен жана Москвадан расмий маалымат алышкан эмес. Азырынча украин тарап бул токтотуу күчкө киргенине толук ишене элек.

Мындан тышкары, АКШ жана Украина дем алыш күндөрү Абу-Даби шаарында өткөн сүйлөшүүлөрдө энергетика объекттерине соккуларды убактылуу токтотуу маселесин карашкан. Бул идея бейпилдик чарасы катары каралган. Владимир Зеленский Трампка ыраазычылыгын билдирип, мындай токтотуулар энергетика тармагын коргоого жана согуштун аяктоосуна чыныгы кадамдарга өбөлгө түзөрүн белгиледи.