Бишкекте окуучуну сүзүп кеткен таксист кармалды

Бишкекте жөө адамдар өтүүчү өтмөктөн окуучуну сүзүп кеткен такси айдоочусу кармалды. Маалыматты Милициянын кайгуул кызмат башкармалыгы тастыктады.

Билдирүүгө таянсак, айдоочу бүгүн, 30-январда кармалган.

Окуя 29-январда саат 13:00 чамасында 7-Апрель көчөсүндө болгон. Анда Hyundai Sonata үлгүсүндөгү унаанын айдоочусу жашы жете элек баланы сүзүп, андан соң изин жашырып кеткен. Ал айдоочу кармалып, Бишкек ШИИББдин Тергөө кызматына жеткирилди.

Социалдык тармактарда буга чейин таксист жол чырактын кызыл жарыгы күйүп турганына карабай өтүп, окуучуну сүзүп алганы тууралуу видео тараган.