БШК шайлоого катышуудан баш тарткан эки талапкердин арызын карады 

№13 шайлоо округу боюнча Жогорку Кеңештин депутаттарын кайра шайлоого катышуудан эки талапкер баш тартты. Бул тууралуу БШКнын басма сөз кызматы билдирди.

Маалыматка ылайык, БШК шайлоого катышуудан баш тартуу тууралуу арыз берген Бактыбек Асамудинов жана Исраилжан уулу Өсөрбектин арыздарын караган. Борбордук шайлоо комиссиясы жарандарын арызы эске алынганын белгиледи.

Маалымат үчүн: БШК Жалал-Абад облусунун №13 округундагы шайлоонун жыйынтыгын жокко чыгарган. Мекеме аталган округда шайлоо бир ай ичинде кайра дайындаларын, мурдагы 14 талапкер кайра катыша албастыгын билдирген. Шайлоо ушул жылдын 1-мартында өтөт.

№13 шайлоо округу Масы айылы. Шайлоочулардын саны 159 миң 906. Шайлоо округуна Базар-Коргон шаарындагы №2423, 2428, 2140, 2141 шайлоо тилкелери, Кеңеш, Арстанбап-Ата, Сайдыкум айыл аймактары кирди.