Депутат жөлөкпул алууга керектелген документтер татаал экенин айтты (видео)

Бүгүн, 30-январдагы "Элдик" жана "Ала-Тоо" депутаттык топторунун биргелешкен жыйынында депутат Уланбек Жаанбаев Орусияга кеткен мигранттардын балдары жөлөкпулсуз калып жатканын билдирди.

Эл өкүлү жөлөкпул алуу үчүн керектелген документтердин татаалдыгына токтолуп, санариптештирүүгө өткөрүүнү сунуш кылды.

"Жөлөкпул алуу үчүн талап кылынган документтер өтө эле татаал. Күйөөсү Орусияга кетсе балдарына жөлөкпул берилбей калыптыр. Эми сиз мигрант болбосоңуз керек. Жыргаганынан Орусияга кетпейт. Ал жерде жакшы турмуш жок, ал барып жумуш табабы, таппайбы белгисиз.

Үйүңдө муздаткыч бар экен, кир жуучу машина бар экен деп текшеришет экен. Үйүндө жүрбөй калган унаа бар болсо, берилбейт. Муну кандай кылып тактайсыздар? Адам катышкан жерде тааныш-билиш боло берет. Муну элге түшүнүктүү кылып, реформага барыш керек. Сиздер санариптештирүүгө өтүшүңүздөр керек. Документти чогултуу кыйын болгондуктан, барбай дагы коюшат экен", - деди депутат.