Иран АКШ менен сүйлөшүүгө Трамп коркутууларды токтотсо гана даяр

Иран АКШ менен сүйлөшүү үстөлүнө отурууга америкалык лидер Дональд Трамп Иран Ислам республикасына карата жаңы аскерий чабуулдар менен коркутууларды токтоткон шартта гана макул болот. Бул тууралуу Ирандын тышкы иштер министри Аббас Арагчи Bloomberg агенттигине билдирген.

Анын айтымында, сүйлөшүүлөр адилеттүү жана тең укуктуу негизде жүргүзүлсө, Тегеран диалогго даяр. Ошол эле учурда Иран өзүнүн ракеталык программасы боюнча эч кандай сүйлөшүүлөргө барбай турганын баса белгилеген.

Министр ошондой эле аскерий жактан Иран учурда 2025-жылдын июнь айында Израил менен болгон кагылышуудан мурдагыга салыштырмалуу кыйла жакшы даярдыкта экенин белгиледи.

Буга чейин The New York Times басылмасы Дональд Трампка Иранга каршы мүмкүн болгон кеңейтилген аскерий чаралардын тизмеси сунушталганын жазган. Анда ирандык объектилерге рейддерди жүргүзүү мүмкүнчүлүгү да камтылган. Маалыматка караганда, бул варианттар Ирандын өзөктүк жана ракеталык программаларына зыян келтирүүгө, ошондой эле өлкөнүн жогорку лидери аятолла Али Хаменейдин позициясын алсыратууга багытталган.