Түркиянын айрым жерлеринде нөшөрлөгөн жамгырдан улам катуу суу ташкыны болду (видео)

Түркиянын Мерсин шаарында катуу нөшөрлөгөн жамгыр жаап, анын кесепетинен шаарда суу ташкыны катталды. Кыска убакыт ичинде көп көлөмдө жааган жаан-чачын көчөлөрдү жана жолдорду каптап, транспорт кыймылына олуттуу тоскоолдук жаратканын чет элдик басылмалар жазышууда.

Жамгырдын айынан Мерсин шаарындагы бир катар дарыялар жана суулар жээктен ашты. Анын ичинде Мезитли жана Теже суулары өз нугунан чыгып, айрыкча шаардын төмөн жайгашкан райондорунда көчөлөр толугу менен суу астында калды.

Шаардын негизги жолдорунун бири — Гази Мустафа Кемал бульварын суу каптап, коопсуздук максатында айрым тилкелери убактылуу жабылды.

Жергиликтүү бийлик өкүлдөрү тургундарды сак болууга, зарылчылык болбосо жолго чыкпоого жана расмий эскертүүлөрдү кылдаттык менен көзөмөлдөөгө чакырууда.