Трамп Гренландия боюнча европалык лидерлер менен сүйлөшүүлөр башталганын билдирди

АКШ президенти Дональд Трамп Гренландия маселеси боюнча европалык лидерлер менен сүйлөшүүлөр башталганын маалымдады. Анын айтымында, тараптар көптөгөн маселелер боюнча бир пикирге келип жатышат. Бул тууралуу чет элдик басылмалар жазышууда.

"Биз сүйлөшүүлөрдү баштадык. Бул бардык тараптар үчүн жакшы келишим болот деп үмүттөнөм. Улуттук коопсуздук жагынан алганда бул абдан маанилүү келишим. Менимче, биз макулдашууга жетебиз", - деген Трамп журналисттерге.

Буга чейин Дональд Трамп АКШ улуттук коопсуздукту камсыз кылуу максатында Гренландияга көзөмөл орнотуусу керектигин бир нече жолу айткан. 22-январда ал НАТОнун башкы катчысы Марк Рютте менен сүйлөшүүлөрдү өткөргөн. Axios басылмасынын маалыматына караганда, тараптар АКШнын аралдагы аскерий катышуусун күчөтүүгө жана пайдалуу кендерди казып алууда артыкчылыктарга ээ болууга мүмкүндүк бере турган келишимди талкуулашкан.