Аксыда мас айдоочу 55 жаштагы жарандын өлүмүнө себепчи болду (видео)

Жалал-Абал облусунун Аксы районунда мас абалындагы айдоочу 55 жаштагы жаранды сүзүп, ал жеринде каза болду. Бул тууралуу ЖКККББнын басма сөз кызматы билдирди.

Маалым болгондой, каргашалуу окуя 30-январда саат 22:40 чамасында болгон. Милицияга аталган райондун аймагында 55 жаштагы эркек кишинин денеси жаткандыгы боюнча маалымат түшкөн. Бул окуя милициянын каттоосуна алынып, Аксы районунун аймагына "Тосмо" иш-мерчеми киргизилген.

Натыйжада окуяга шектүү катары Аксы районунун 1967-жылы туулган К.Ж. аттуу тургуну кармалып, ал айдап жүргөн Ниссан Примера үлгүсүндөгү автоунаасы айып короого токтотулду. Текшерүү иштеринин жүрүшүндө айдоочу окуя болгон учурда мас абалда болгондугу аныкталган.

Шектүү каза болгон жаранды көрбөй калгандыгын айтып, ал жолдо жатып калган болушу мүмкүн деп божомолдоодо.

Милиция жарандарды спирт ичимдигин ичкен абалда автоунаа башкарбоого чакырат.