Күн бетинде рекорддук активдүүлүк: Бир күндө 16 күчтүү жаркыроо катталды

Орусиянын Илимдер академиясынын Космостук изилдөөлөр институтуна караштуу Күн астрономиясы лабораториясы 1-февралда Күндө М жана Х класстагы 16 кубаттуу жаркыроо катталганын маалымдады.

Илимпоздордун билдирүүсүндө бул көрсөткүч акыркы он жылдагы эң жогорку деңгээлдердин бири экени белгиленет.

"Акыркы он жыл ичинде, тактап айтканда, 2015-жылдын 1-январынан бери мындан көп жаркыроо катталган бир гана учур болгон - 2024-жылдын 29-декабры. Ал эми азыр 2026-жылдын 1-февралы он жылдык рейтингде экинчи орунга чыкты",- деп айтылат лабораториянын маалыматында.

Эмне үчүн өтө ири жаркыроолор болгон жок?

Адистердин түшүндүрмөсүнө ылайык, М класстагы жаркыроолордун тынымсыз болуп турушу Күндө андан да күчтүү - эң жогорку баллдагы жаркыроолордун пайда болушуна тоскоол болуп жатат.

"Энергиянын М деңгээлиндеги жаркыроолор аркылуу үзгүлтүксүз “жанып турушу”, сыягы, андан да ири масштабдагы жаркыроолорду алдын алган жалгыз фактор болуп жатат",- деп белгилешет окумуштуулар.

Эң күчтүү жаркыроонун чокусу

Колдонмо геофизика институтунун маалыматына ылайык, эң кубаттуу жаркыроонун чокусу 1-февралда Москва убактысы боюнча саат 15:33тө катталган. Бул тууралуу мекеме ТАСС агенттигине билдирген.

Бул Жер үчүн канчалык кооптуу?

Астрономдордун айтымында, Х класстагы жаркыроолор:

• геомагниттик бороон-чапкындарга,
• спутник байланыштарынын үзгүлтүккө учурашына,
• радио байланыштын начарлашына алып келиши мүмкүн.

Ошол эле учурда, бардык эле күн жаркыроолору Жерге түз таасир эте бербейт, бул алардын багытына жана коштолгон плазмалык булуттардын бар-жогуна жараша болот.

Адистер Күндөгү активдүүлүк күн циклинин жогорку фазасына жакындап калганын көрсөтүп жатканын белгилеп, жакынкы айларда да мындай көрүнүштөр кайталанышы мүмкүн экенин эскертишүүдө.