Ыштын кесепетинен улам аллергиялык ринит 2,5 эсе көбөйгөнү айтылды (видео)

Бүгүн, 2-февралда парламенттин Агрардык саясат, суу ресурстары, жер казынасын пайдалануу, айлана-чөйрөнү коргоо комитетинин жыйынында Коомдук саламаттыкты сактоо улуттук институтунун директору Жаркынбек Касымбеков ыштын ден соолукка тийгизген таасири тууралуу маалымат берди.

Анын айтымында, ыштын кесепетинен улам аллергиялык ринит 2,5 эсе көбөйгөнү байкалган.

"Абанын булганышы ден соолукка түздөн түз таасир берет. Статистика боюнча, оорулардын саны азайганы менен өпкө, дем алуу органдарындагы оорулар көбөйүүдө. Анын ичинен аллергиялык ринит оорусу түзмө-түз абанын булганышына байланыштуу. Бул оору өзгөчө жаш балдардын арасында 2,5 эсеге көбөйгөнү байкалууда",- деген ал.