Башталгыч класстын мугалимдерине 20 миңден ашык ноутбук тапшырылды (видео)

Бүгүн, 2-февралда республиканын мектептеринин башталгыч класстарынын мугалимдери үчүн 20 миң 286 даана “Алтын казык” брендиндеги ноутбуктар тапшырылды. Бул тууралуу Агартуу министрлигинен билдиришти.

Маалыматка ылайык, ноутбуктар райондук билим берүү бөлүмдөрү аркылуу мугалимдерге жеткирилет. Кийинки партияларда тарых, география жана кыргыз тили предметинин мугалимдерине берүү пландалууда.

Ата мекендик ноутбуктар Исхак Раззаков атындагы КМТУнун “Технопарк” мекемесинде чогултулуп, белгиленген техникалык талаптарга ылайык даярдалган. Ар бир ноутбукта атайын лицензияланган программалар орнотулуп, алар автоматтык түрдө жаңыртылып турат жана коопсуздук мүмкүнчүлүктөрү менен камсыздалган. Мындан тышкары, мугалимдердин күнүмдүк ишине зарыл методикалык колдонмолор жана керектүү программалар киргизилген.

Эске салсак, өткөн жылы STEM предметтеринин (математика, физика, химия, биология, информатика) мугалимдерине 27 миң 31 даана “Алтын казык” ноутбугу берилген.