Жеке автомектеп жетекчиси баш аламандыкка шектелип кармалганы белгилүү болду

"Айдоочуларды даярдоо борбору" жеке менчик автомектебинин жетекчиси Медербек Тагайбек уулу кармалып, камакка алынды. Маалыматты бүгүн, 2-февралда Бишкектин Биринчи Май райондук сотунун басма сөз кызматы тастыктады.

Маалыматка ылайык, ал Кылмыш-жаза кодексинин 278-беренесинин 3-бөлүгү (Бийлик өкүлдөрүнүн мыйзамдуу талаптарына жигердүү баш ийбөөгө жана массалык баш аламандыктарга чакырыктар, ошого тете жарандарга зомбулук көрсөтүүгө чакырыктар) боюнча шектелүүдө.

Райондук сотко аны камакка алуу өтүнүчүн ИИМдин тергөөчү келтирген. Сот 30-январда Тагайбек уулун 28-мартка чейин камакка алуу чечимин чыгарган.

ИИМ бул боюнча азырынча маалымат бере элек.

Буга чейин социалдык тармактарда Тагайбек уулунун Транспорт каражаттарын жана айдоочулук курамды каттоо мамлекеттик мекемесинин дарегине сын айткан видеосу тараган.