Бишкек милициясы автомектеп жетекчисинин кармалганына түшүндүрмө берди

Бишкек шаардык милициясы жеке менчик автомектептин жетекчиси Медербек Тагайбек уулу кармалганын билдирди.

Маалыматта meder.tagaibekovich деген аталыштагы Instagram баракчасында бийликтин беделин түшүрүүгө жана өлкөдөгү коомдук-саясий кырдаалды курчутууга багытталган материалдар жарыяланганы аныкталганы айтылат.

Мындан улам факт боюнча Кылмыш-жаза кодексинин 278-беренесинин 3-бөлүгүнүн (Бийлик өкүлдөрүнүн мыйзамдуу талаптарына жигердүү баш ийбөөгө жана массалык баш аламандыктарга чакырыктар, ошого тете жарандарга зомбулук көрсөтүүгө чакырыктар) негизинде кылмыш иши козголгон.

"Айдоочуларды даярдоо борбору" автомектебинин директору 31 жаштагы Тагайбек уулу Бишкек шаардык милициясынын убактылуу кармоочу жайына киргизилген. Учурда тергөө иштери уланууда.

Буга чейин анын кармалып, 28-мартка чейин камакка алынганы белгилүү болгон.