Комитет жыйынында депутат Түмөнбаев менен чиновник сөз талаша кетти (видео)

Бүгүн, 3-февралда Жогорку Кеңештин Өнөр-жай саясаты, транспорт, отун-энергетикалык комплекс, архитектура жана курулуш комитетинин жыйынында депутат Акылбек Түмөнбаев курулуш министринин орун басары Талантбек Иманакун уулу менен сөз талаша кетти.

Алардын талашынын себеби Каракол шаарындагы оорукана болду. Түмөнбаев буга чейин эмес, акыркы бир жыл аралыгында ооруканага байланыштуу кандай иштер аткарылгандыгына кызыкты.

"Оорукананын котлованы казылып калган. Былтыр барганда сиз жүргөнсүз, Нурдан Кемелович жүргөн. Эмне аткарылды?",- деди депутат

Министрдин орун басары буга чейин ал ишти ким ишке ашырбай жүргөндүгүн айтуу керектигин билдирип, 1 жылдан бери айыл өкмөт жерди трансформациялоо иштерин жүргүзгөнүн айтты. Ошондой эле каражат бөлүнбөгөнүн белгилеп, быйыл иш жүрө тургандыгын кошумчалады.

"Акча бөлүнбөсө, эмне кылып салалы? Айтсаңыз? Быйыл долбоорго киргиздик. Ошол жерди баштайбыз",- деди Талантбек Иманакун уулу.

Эмоцияга алдырган чиновникке комитет жетекчиси тарабынан эскертүү берилди.

Ал эми эл өкүлү министрликти реалдуу багыттарга токтолуп, толук аткарылган гана иштерди айтып мактанууга чакырды.