Милиция жана абак кызматкерлери соттолгон адамды алдоого шектелүүдө

Жаза аткаруу мамлекеттик кызматынын 16-түзөтүү мекемесинин жана Бишкектин Биринчи Май райондук милициясынын кызматкерлери кармалышты. Бул тууралуу Улуттук коопсуздук мамлекеттик комитети билдирди.

Маалыматка ылайык, эки шектүү 2024-жылдын декабрынан 2025-жылдын апрелине чейин түзөтүү мекемесиндеги соттолгон адамдын ишенимине киришип, ага кечирим берүү үчүн ири суммадагы акча алышкан. Бирок кийинчерээк соттолгон жарандын кечирими четке кагылган.

Аталган факт боюнча Кылмыш-жаза кодексинин "Алдамчылык" беренеси менен кылмыш иши козголуп, кармалган шектүүлөр УКМКнын убактылуу кармоочу жайына киргизилишти.