Чубак Жалиловго "Кыргыз Республикасынын баатыры" наамын берүү сунушталды

Президент Садыр Жапаров бүгүн, 3-февралда Дин иштери жана этностор аралык мамилелер боюнча улуттук агенттиктин төрагасы Талантбек Ташибековду кабыл алды.

Мамлекет башчынын администрациясы президент Ташибековду кызматка дайындоо учурунда ага бир катар тапшырмаларды бергенин билдирди.

Агенттиктин төрагасы мамлекет башчысына агенттиктин иш пландары жөнүндө маалымат берип, дин жана этностор аралык мамилелер чөйрөсүндөгү артыкчылыктуу багыттар тууралуу айтып берди. Жапаров диний чөйрө жана этностор аралык мамилелер маселелери өзгөчө салмактуу, жоопкерчиликтүү жана кылдат мамилени талап кыларын баса белгиледи.

Ташибеков уюмдун түзүлгөндүгүнүн 30 жылдыгына карата юбилейлик иш-чараларды өткөрүү пландары жөнүндө маалымдап, буга байланыштуу мамлекет башчысынан эмгек сиңирген дин ишмерлерин мамлекеттик сыйлыктар менен сыйлоо маселесин кароону өтүндү.

Президент бул маселе боюнча макулдугун билдирди, ошондой эле диний ишмер жана агартуучу Чубак ажы Жалиловго көзү өткөндөн кийин "Кыргыз Республикасынын Баатыры" деген ардактуу наамын ыйгаруу мүмкүнчүлүгүн карап чыгууну сунуштады.

Соңунда президент Ташибековго Улуттук агенттиктин тутумдуу жана ачык-айкын ишин камсыз кылууну, ошондой эле дин аралык жана этностор аралык ынтымакты бекемдөө, биримдикти жана адилеттүүлүк принциптерин илгерилетүү маселелерине өзгөчө көңүл бурууну тапшырды.