Италиянын президенти дүйнө жүзүндө олимпиадалык тынчтыкты сактоого чакырды

Италиянын президенти Серджо Маттарелла дүйнө жүзүндө олимпиадалык тынчтык режимин сактоо боюнча расмий чакырык жасады. Ал спортту зомбулукка каршы туруунун жана элдерди бириктирүүнүн негизги куралы катары белгиледи. Бул тууралуу италиялык жергиликтүү ЖМКлар жазып чыгышты.

Италия лидери бул кайрылуусун 6-февралда баштала турган Милан жана Кортина-д’Ампеццо шаарларында өтө турган Кышкы Олимпиада оюндарынын алдында эл аралык коомчулукка жолдогон. ANSA агенттиги тараткан билдирүүгө ылайык, спорт саясий карама-каршылыктарга карабастан элдерди бириктире алган тынчтык мүнөздөгү өзгөчө форма болуп саналат.

Серджо Маттарелла "спорттун куралсыз күчү" куралдуу кагылышуулар жүрүп жаткан аймактарда мелдештер учурунда куралдын үнүн басууга жетиштүү болот деген үмүтүн билдирди.

Олимпиадалык тынчтыкты так сактоого чакырык быйыл Олимпиаданы кабыл алып жаткан Италиянын негизги дипломатиялык билдирүүсү катары бааланды. Кышкы Олимпиада оюндары 22-февралга чейин уланат. Италия бийлиги бул мезгил дүйнөлүк деңгээлде чыңалууну азайтууга өбөлгө болот деп ишенет.