Ошто каралбай калган үч негизги көчөнүн инфратүзүмү оңдолот

Бүгүн, 4-февралда Ош шаарынын мэри Жеңишбек Токторбаев Сулайман-Тоо аймактык башкармалыгына караштуу Алымбек датка көчөсүндө рейд өткөрдү.

Анын жүрүшүндө мэр борбордук аянтты көрктөндүрүү жана жашылдандыруу иштерин күчөтүү зарылдыгын белгилеп, жаңы курулуп жаткан имаратка ылайык анын айланасын иретке келтирүү керектигин билдирди.

Калаа мэриясы билдиргендей, Токторбаев шаардын негизги Алымбек датка, Курманжан датка жана Масалиев көчөлөрүнүн инфратүзүмү этап-этабы менен оңдолорун белгиледи.

Мэр мындан тышкары Алымбек датка көчөсүндө жүргүзүлүп жаткан иригациялык лотокторду орнотуу иштери менен таанышып, тиешелүү кызматтарга жарандарга ыңгайсыздык жаратпай, жумуштарды мүмкүн болушунча эртерээк жана сапаттуу бүтүрүү боюнча тапшырмаларды берди.