Абанын сапатын жакшыртуу боюнча мекемелер аралык комиссиянын жыйыны өттү

Жаратылыш ресурстары, экология жана техникалык көзөмөл министрлигинде өлкөдө абанын сапатын жакшыртуу боюнча мекемелер аралык комиссиянын кезектеги жыйыны болуп өттү.

Жыйынга ондон ашуун министрликтердин жана мекемелердин өкүлдөрү жана Жогорку Кеңештин депутаттары катышты. Анда өлкөдөгү экологиялык абалды жакшыртууга багытталган негизги маселелер каралды.

Жыйында Бишкекте электрондук такси мамлекеттик кызматын киргизүү, Чүйдө жана борбор калаада газдаштыруунун учурдагы абалы жана келечеги, ошондой эле атмосфералык абанын сапатын мониторингдөө системасын өнүктүрүү, анын ичинде байкоо жүргүзүүчү сенсорлорду орнотуу жана модернизациялоо маселелери талкууланды.

Отурумда борбор шаардын аймагында электр заряддоочу станциялардын тармагын өнүктүрүү максатында Бишкек шаарынын мэриясынын жетекчилиги алдында мекемелер аралык комиссиянын мүчөлөрүнөн турган ведомстволор аралык жумушчу топ түзүү жөнүндө чечим кабыл алынды.

Ошондой эле Бишкек шаарында экологиялык таксини киргизүү долбоорун ишке ашыруунун алкагында Улуттук инвестициялык фондго майыптыгы бар жарандар үчүн кызматтын ыңгайлуулугун жана жеткиликтүүлүгүн камсыз кылуу боюнча сунуштарды эске алуу тапшырылды. Ал эми «Газпром Кыргызстан» ЖЧКсына Бишкек шаарын жана республиканын аймактарын газдаштыруу боюнча иш-чараларды ишке ашырууну тездетүү сунушталды.