Таш-Көмүрдө саркынды сууларды тазалоочу жай куруу пландалууда (видео)

Жалал-Абад облусундагы Таш-Көмүр шаарында саркынды сууларды тазалоочу жай куруу пландалууда. Бул тууралуу президенттин жана өкмөттүн Жогорку Кеңештеги өкүлү Алмазбек Абытов парламенттин 4-февралдагы жыйынында айтты.

"Азыркы учурда Таш-Көмүр шаарында Европа реконструкциялоо жана өнүктүрүү банкынын каржылоосу менен биринчи фазасы ишке ашырылууда. Натыйжада ал жакта ичүүчү таза суу маселеси чечилет. Экинчи фазасында саркынды сууларды тазалоочу жайдын курулушу пландаштырылган.

Ал эми Шамалды-Сай шаарында ичүүсү таза суу куруу жана саркынды сууларды тазалоо жайларын куруу тууралуу ЕРӨБна сунушталган. Бул маселе кошумча республикалык бюджетке да сунушталат", - деди Абытов.

Жогорку Кеңештин бүгүнкү жыйынында депутат Кундузбек Сулайманов Таш-Көмүр шаарында саркынды суу тууралуу маселе көтөргөн болчу.