Окуучуларды ЖРТга даярдоо боюнча тиркеме иштелип чыгууда

Бүгүн, 4-февралда Агартуу министрлигинде мектеп окуучуларын жалпы республикалык тестке даярдоо үчүн иштелип жаткан мобилдик тиркеме талкууланды.

Долбоор тесттик материалдарына бирдей жеткиликтүүлүктү камсыз кылууга жана өлкөнүн бардык абитуриенттери үчүн тең даярдык мүмкүнчүлүктөрүн түзүүгө багытталган.

Министрлик тиркемеге ЖРТга кирген бардык предметтер боюнча суроолорду жайгаштыруу пландаштырылып жатканын билдирди.

Тапшырмалар мурунку жылдарда Билимди баалоо жана окутуу усулдары борбору тарабынан түзүлгөн тесттердин негизинде иштелип чыгууда. Учурда долбоор текшерүү баскычында турат. Тиркеме тиешелүү адистер тарабынан мазмуну текшерилгенден кийин ишке киргизилет жана акысыз жеткиликтүү болот.