Депутат ыш менен күрөшүүдө жашылдандырууга көңүл буруу керектигин билдирди (видео)

Бүгүн, 5-февралдагы Жогорку Кеңештин жыйынында депутат Дастан Бекешев ыш маселеси менен күрөшүүдө жашылдандырууну жакшыртууну сунуштады.

Эл өкүлү жашылдандыруу үчүн жарандарга жер берүү мүмкүнчүлүгүн түзүүнү демилгеледи.

"Ыш менен күрөшүүдө биз ар дайым газдаштырууга, электр транспортун өнүктүрүүгө жана көмүр керектөөнү азайтууга көңүл буруп келебиз. Ал эми жашылдандырууга көңүл бурбайбыз. Жарандарга ижарага же бекер деле жер берсеңер, алар жашылдандырууга даяр. Мен өзүм дагы даярмын, демөөрчүлөрдү таап, 7 менен 12-кичирайондоруна сквер түзүп, жашылдандырып берүүгө. Ушуну карап чыксаңар",- деди эл өкүлү.

Министрлер кабинетинин төрагасынын биринчи орун басары Данияр Амангелдиев өкмөт эл өкүлүнүн демилгесин колдоого даяр экенин билдирди. Ошондой эле жашылдандырууга багытталган өкмөттүн токтомдорун ишке ашыруу боюнча жергиликтүү деңгээлде иштер жүрүп жатканын кошумчалады.