Депутат Бишкектин ышына парламенттин токтому жардам берерин билдирди (видео)

Бүгүн, 5-февралдагы Жогорку Кеңештин жыйынында өкмөт өкүлдөрүнө депутат Дастан Жумабеков Жогорку Кеңештин токтомдорун колдонсо, Бишкектеги ыш маселеси чечилмектигин билдирди.

Эл өкүлү тийиштүү тескемеде жашоочуларды көгүлтүр от менен камсыздоого пайызсыз насыяларды берүү пункту бар экенин белгилеп өттү.

"Жогорку Кеңештин токтомдору менен иш алып барсаңыздар, бүгүнкү күндө ыш маселесин чечүүгө бир топ эле жардам бермек. Элде айтпасак да насыя көп. Алар насыя алып меш коюп, газ киргизе албайт. Пайызсыз насыяларды төлөйт. Карызды 2 жылга чейин бөлүп берип тургула. Газды төлөгөн сайын ошонунун үстүнө карызды кошуп койгула. Ушуга токтобосок болбойт. "Газпром" өз ишин кылып жатат, үйгө киргизип алганга элде акча жок. Сиздер банк аркылуу насыя алып, үстүнө дагы кошкула деп жатасыздар. Жарандардын моюнунда 2-3төн банк насыясы бар. Газ киргизүүдө да пайыз кошуп берсек, оордук болуп калат",- деди депутат.

Министрлер кабинетинин төрагасынын биринчи орун басары Данияр Амангелдиев 3 пайыз менен көп жылдык насыя берилип жатканын айтып, көмүрдүн сапатына да көңүл бурулганын белгилеп өттү. Ал эми пайызсыз насыялар боюнча иштер жүрүп жатканын кошумчалады.