Жолдорду булгаганы үчүн курулуш компаниялары жоопкерчиликке тартылышты

Бишкек шаарынын мэриясынын муниципалдык инспекциясы Бишкек –“Манас” эл аралык аэропортуна кеткен трассанын боюндагы инфраструктуралык объекттердин курулушу учурунда жолдун санитардык абалынын сакталышына көзөмөл жүргүзүүдө.

Мэриядан билдиришкендей, текшерүүлөрдүн жүрүшүндө курулуш иштерине тартылган техника тарабынан топуракты жолдун ортосуна чыгарып койгон фактылары аныкталган.

"МЭНС ЖЧКсы компаниясынын курулуш аянтчасында дөңгөлөк жуучу пункт өз багыты боюнча колдонулган эмес. Буга чейин берилген көрктөндүрүү эрежелерин сактоо тууралуу талап белгиленген мөөнөттө аткарылган жок. Ушуга байланыштуу компанияга Укук бузуулар жөнүндө кодексинин 177-беренесинин 2-бөлүгү боюнча протокол түзүлдү. Мындан тышкары жолдун булганышын алдын алуу жана жол кыймылынын коопсуздугун камсыз кылуу максатында участокту бетон менен каптоо боюнча кайрадан талап коюлду.

“Манас Моторс” ЖЧК компаниясынын объектисинде дөңгөлөк жуучу пункт жок. Компанияга үч күндүн ичинде эстакада жана трансбой орнотуу тууралуу талап коюлду. Талап аткарылбаган учурда колдонуудагы мыйзамдарга ылайык чаралар көрүлөт”, - деп жазылган маалыматта.

Муниципалдык инспекция бардык курулуш компаниялары курулуш аянтчаларынан чыккан жерлердин жана ага чектеш аймактардын тазалыгын туруктуу негизде камсыз кылууга милдеттүү экенин эскертет.