Билет баасы канча? Кышкы олимпиада оюндарынын ачылышы болот 

Кышкы олимпиада оюндарынын ачылыш аземи бүгүн, 6-февралда кечинде Италиянын түндүгүндө өтөт.

Азем Миланда жергиликтүү убакыт боюнча саат 20:00дө башталышы пландалууда. Сахнадагы аткаруучулардын арасында италиялык ырчы Андреа Бочелли, беш жолку "Грэмми" сыйлыгынын ээси Мэрайя Кэри, "Мыкты ыр" үчүн "Алтын глобус" сыйлыгынын ээси Лаура Паузини бар. Италиялык актёрлор Пьерфранческо Фавино, Сабрина Импаччиаторе жана Матильда Де Анжелис да өнөр көрсөтүшөт. Ачылыш аземинин темасы "Гармония" болот. Кирүү акысы 260 евродон башталып, 2000 еврого чейин жетет.

Ачылыш аземине бир катар өлкөлөрдүн өкмөт өкүлдөрү катышат. Бейшемби күнү АКШнын вице-президенти Жей Ди Вэнс жубайы Уша жана балдары менен бирге АКШнын Чехияга каршы кыздар арасындагы хоккейи боюнча беттешин көрүү үчүн Италияга келген. АКШнын мамлекеттик катчысы Марко Рубио жана АКШнын Италиядагы элчиси Тилман Фертитта дагы ачылыш аземине катышат.

Аземге Италиянын президенти Серджио Маттарелла жана эл аралык Олимпиада комитетинин президенти Кирсти Ковентри да катышат.

Олимпиада 22-февралга чейин уланат. Ага 92 улуттук курама командадан 2900дөн ашык спортчу, ошондой эле Орусия менен Беларустун бейтарап спортчулары катышат.

Эң көп спортчулар АКШдан, Канададан жана Италиядан катышууда. Олимпиаданын негизги шаарлары болгон Милан жана Кортина-д'Ампеццодон тышкары, мелдештер өлкөнүн түндүгүндөгү дагы 11 жерде өткөрүлөт. Олимпиада оюндарында жалпысынан 116 медаль ойнотулат.

Тарыхта биринчи жолу Бенин, Гвинея-Бисау жана Бириккен Араб Эмираттарынын спортчулары кышкы олимпиада оюндарына катышат.

Олимпиада оюндарына болжол менен 2 миллион күйөрман келет деп күтүлүүдө. Мелдештерге билеттердин баасы 30 доллардан башталып, 1400 долларга чейин жетет.

Италия буга чейин кышкы олимпиада оюндарын 2 жолу өткөргөн.