АКШ бийлиги жарандарын Ирандан чыгып кетүүгө чакырды

АКШ бийлиги жарандарын Ирандан токтоосуз чыгып кетүүгө чакырып, аларга өкмөттүн жардамын күтпөстөн өз алдынча чыгуу планын иштеп чыгууну сунуштады. Бул тууралуу чет элдик маалымат агенттиктери жазышты.

АКШнын Ирандагы элчилигинин билдирүүсүнө ылайык, өлкөнүн жарандары жөн гана америкалык паспортко ээ болгону үчүн кармалышы мүмкүн. Дипломатиялык кызмат ошондой эле интернеттин үзгүлтүккө учурашы жана каттамдардын токтотулушу мүмкүн экенин эскертти.

"Эгер өлкөдөн чыга албасаңыз, үйүңүздүн же башка коопсуз имараттын ичинен коопсуз жай табыңыз. Тамак-аш, суу, дары-дармек жана башка керектүү нерселерди камдап алыңыз. Демонстрациялардан алыс болуңуз",- деп айтылат маалыматта.

АКШ бийлиги мүмкүн болгон чыгуу жолдору катары Армения же Түркия аркылуу өтүүчү кургактык жолдорун атаган.

Эске салсак, 26-январда АКШнын президенти Дональд Трамп Иран тарапка армия жөнөтүлөрүн билдирген жана Тегеран менен "адилеттүү жана тең укуктуу" келишим түзүү үмүтүн билдирген. Иран тарап Трамптын айткандарына жооп кылып, АКШнын жана анын өнөктөштөрүнүн Жакынкы Чыгыштагы аскердик инфраструктурасына коркунуч келтирерин билдирген. АКШнын атайын элчиси Стивен Уиткофф менен Ирандын тышкы иштер министри Аббас Аракчинин жолугушуусу 6-февралда Стамбулда пландалган.

Ал эми 4-февралда АКШ Иранга сүйлөшүүлөрдүн ордун жана форматын өзгөртүү талабына макул болбой турганын билдирген. Ошого карабастан, тараптар акыркы чечимге келип, жолугушууну Оманда 6-февралда өткөрүүгө макулдашкан.