Куба АКШнын коркутууларынан улам согушка даярданып жатканы айтылды

АКШнын агрессивдүү билдирүүлөрү Кубаны басып кирүү мүмкүнчүлүгүн олуттуу карап көрүүгө мажбурлап жатат. Аралда аскердик машыгуулар жүрүп жатат жана жарандык калк мобилизацияга даярдалууда. Бул тууралуу Орусиянын Кубадагы элчиси Виктор Коронелли Известия басылмасына билдирди.

"Кариб деңизиндеги кырдаалдын курчушу жана Вашингтондун агрессивдүү риторикасынын шартында Кубанын жетекчилиги өлкө согуштук абалдын киргизилишине даярдануу планын иштеп чыкканын жарыялады. Аскердик машыгуулар үзгүлтүксүз өткөрүлүп турат, жарандык калк мобилизация учурунда даярдалып жатат жана Куба коргонууга даяр",- деген дипломат.

Эксперттердин айтымында, Кубанын куралдуу күчтөрү окутулган, бирок алардын аскердик-техникалык компоненттери модернизациялоого муктаж.

Макалада ишемби күндөрү жарандар буктурмаларды жасоо, мина коюу боюнча машыгып жатышканы жазылат. Ошондой эле аскердик медицина жана массалык кыргын салуучу куралдардан коргонуу боюнча машыгууларды өткөрүшөрү кошумчаланган. Машыгууларга Кубанын президенти Мигел Диас-Канелдин өзү баштаган өкмөт өкүлдөрү катышып жатышат.

Азырынча басым кесипкөй аскер кызматкерлерине жасалууда. Ачык булактардын маалыматы боюнча, Кубанын куралдуу күчтөрүнүн жалпы саны 1,2 миллиондон ашат. Алардын 50 миңи активдүү, 40 миңи резервде, ал эми 1,1 миллиондон ашыгы аскерлештирилген күчтөр (уюштуруучулук, функционалдык же окутуу жагынан кадимки куралдуу күчтөргө окшош куралдуу түзүлүштөр). Бардык кубалык эркектер эки жылдык милдеттүү аскердик кызмат өтөшөт жана 45 жашка чейин резервде болушат.

Аталган өлкөдө америкалык атайын күчтөр Венесуэланын аймагына кирип, президент Николас Мадурону жана анын аялын туткунга алгандан бери коргонуу күчөтүлүүдө. Вашингтон Венесуэладан кийин Кубага кысым көрсөтө баштады.