Батирин сатып, акчасын карматкан... Бишкекте алдамчылык фактысы иликтенүүдө

Бишкекте ири өлчөмдөгү алдамчылыкка шектелип 27, 23 жана 18 жаштагы жарандар кармалышты. Бул тууралуу борбор калаанын милициясы билдирди.

Маалымдалгандай, алар бишкектик тургунга ар кандай телефон номурлары менен WhatsApp мессенжери аркылуу байланышып, өздөрүн УКМКнын жана банк мекемелеринин кызматкерлери катары тааныштырышып, алдашкан.

Шектүүлөр жабырлануучуга психологиялык басым көрсөтүү аркылуу ар кандай каржылык операцияларды жүргүзүү зарылдыгы тууралуу көрсөтмөлөрдү беришкен. Натыйжада, жаран өзүнө таандык батирин сатып, акчасын көрсөтүлгөн эсептерге которгон. Келтирилген материалдык зыяндын жалпы суммасы 22 миллион 130 миң сомду түзгөн.

Бул факт боюнча Кылмыш-жаза кодексинин 209-беренеси (Алдамчылык) менен кылмыш иши козголуп, алар убактылуу кармоочу жайга киргизилген. Учурда бул кылмышка тиешеси бар башка адамдарды аныктоо иштери жүрүүдө.