Садыр Жапаров автомектептердин ээлеринен кечирим сурады

Өлкө башчысы Садыр Жапаров жеке автомектептерди жапканы үчүн ээлеринен кечирим сурап, аларды башка ишкерликке өтүүгө чакырды.

Президент реформа келечек үчүн керек экенин белгиледи.

"Мен мунун баарын жеке кызыкчылыгым үчүн жасап жаткан жокмун. Келечек баарыбыздыкы. Силердики дагы. "Окуду" кылып справка берип, "өттү" кылып күбөлүк саткан кызматкердин жакын адамын ошол күбөлүк сатып алган айдоочу сүзүп өлтүрүп кеткен учурлар болду.

Бул дагы болсо ошол күбөлүк саткан кызматкерге Кудайдын берген белгиси деп ойлойм. Ошондуктан башка бизнеске өткүлө"- деди мамлекет башчысы "Кабар" агенттигине берген маегинде.

Эске салсак, Садыр Жапаров январдын этегинде жеке менчик автомектептердин ишин токтотуу боюнча жарлыкка кол койгон.