Таглар үңкүрүнөн байыркы адамдын калдыктары аныкталды

Азербайжандын аймагындагы үңкүрлөрдүн биринен байыркы адамдын калдыктары табылды. Бул тууралуу жергиликтүү AzərTaj агенттиги өлкөнүн Улуттук илимдер академиясына шилтеме берүү менен кабарлады.

Маалыматка ылайык, табылга Ходжавенд районунда жайгашкан Таглар үңкүрүндө жүргүзүлгөн изилдөөлөрдүн жүрүшүндө аныкталган. Бул Азербайжандын аймагында табылган байыркы адамдын сөөктөрү боюнча экинчи палеоантропологиялык табылга болуп саналат.

Учурда табылган сөөктөр Японияда илимий анализден өткөрүлүүдө. Изилдөө иштери аяктагандан кийин байыркы адамдын сөөктөрү эл аралык деңгээлде тааныштырылары айтылды.

Белгилей кетсек, Азербайжанда биринчи жолу 300 миң жылдан ашуун убакытка таандык палеоантропологиялык табылга 1968-жылы Азых үңкүрүнөн (Бакуга жакын аймакта) табылган.