Лувр тарыхый таажыны калыбына келтирүүгө камынууда

Париждеги Лувр музейи императрица Евгениянын таажысын уурдалгандан кийинки сүрөтүн биринчи жолу коомчулукка көрсөттү. Белгилүү болгондой, өткөн жылдын 19-октябрында болгон уурулук учурунда кылмышкерлер шашылыш качып бара жатып таажыны көчөгө таштап кетишкен.

Чет элдик басылмалар жазгандай, музей кызматкерлеринин маалыматына ылайык, кымбат баалуу артефакт олуттуу зыянга учураган. Таажы катуу ийилип, сегиз алтын бүркүттүн бири жоголгон, ошондой эле 1354 бриллианттын 10у жок экени аныкталган. Ошол эле учурда бардык 56 изумруд ордунда сакталган.

Учурда Лувр таажыны калыбына келтирүүнү пландап, реставраторлор арасында атайын конкурс жарыялай турганын билдирди. Консультативдик комитеттин курамына Cartier, Mellerio, Chaumet, Boucheron жана Van Cleef & Arpels сыяктуу белгилүү зергерлик үйлөрдүн өкүлдөрү кирет.