Иран: "АКШ коркутуулардан жана басымдан баш тартса гана диалог улантылат"

Омандагы сүйлөшүүлөрдүн жүрүшүндө Иран АКШдан коркутуулардан жана саясий басымдан баш тартууну талап кылды, деп билдирген Ирандын тышкы иштер министри Аббас Аракчи IRNA агенттигине берген маегинде.

Анын айтымында: “Кез келген диалогтун шарты – коркутуулардан жана басымдан баш тартуу. Биз муну түз билдирдик жана сүйлөшүүлөрдүн улануусу үчүн бул милдеттүү түрдө сакталууга тийиш”, — деп баса белгиледи министр.

Эске салсак, Аракчи буга чейин АКШ менен Иран Омандын ортомчулугу менен ядердик программа боюнча байланыштарды улантууга макулдашканын маалымдаган. Акыркы чечим кийинчерээк жарыяланат.

Ошол эле учурда 6-февралда Reuters агенттиги билдиргендей, АКШ менен Ирандын ортосунда аскердик кагылышуу коркунучу жогору бойдон кала берүүдө, анткени Тегеран сүйлөшүүлөрдө олуттуу макулдашууларга барбайт деп бааланууда.