Ыраазычылык билдирип... Садыр Жапаров биринчи мугалими менен жолугушту (сүрөт)

Президент Садыр Жапаров Ысык-Көл облусуна болгон иш сапарынын алкагында биринчи мугалими Кеңешкан Шаменова менен жолугушту. Бул туурасында 7-февралда президенттик администрациядан билдирди.

Буга чейин социалдык тармактарда Садыр Жапаровдун башталгыч класстагы мугалими ага кайрылып, жеке жолугушууну суранган видеоролик тараган.

Президент мугалиминин ага алгачкы жолу “А” тамгасын жазууну үйрөткөнүн ушул күнгө чейин унутпай турганын белгиледи. Ал ошол кезде балдар бала бакчада даярдыктан өтпөй, мектепке түз эле жети жашында барышканын айтып берди.

Жапаров башталгыч класстарда окуган кезиндеги мугалиминин сабырдуулугу жана эмгеги үчүн ага терең ыраазычылыгын билдирди.

Жолугушуунун жүрүшүндө Кеңешкан Шаменова окуучусунун ишмердүүлүгүн сыналгыдан тыкыр көзөмөлдөп турарын жана анын президент катары жетишкен ийгиликтерине чын жүрөктөн кубанарын айтты. Ал Садыр Жапаров бала кезинде эле дептерине “Эл үчүн иштейм” деп жазганын эске салды.